أخبار مصرأهم الاخبارالأدب و الأدباءالثقافةحصرى لــ"العالم الحر"زمن الفن الجميل

العالم الحر تنشر رواية , أرواح بتطير , للشاعر الكبير سعدنى السلامونى

الفصل الأول ,,, آدى آخرة اللي بفكر يطير

أدى اخرة اللى يفكر يطير

ياأهل قرطبة

الحاضر يعلم الغايب

والصاحى يفوق النعسان

بيان هام

وأهم بيان

أمر من جلالة السلطان

بعزل عباس بن فرناس

الذى يحرض الناس

على الطيران

الصاحى يعلم الغايب

والفايق يفوق النعسان

يا أهل قرطبة

عباس بن فرناس

صنع جلابية من ريش

وركب لها الجناحين

وطلع فوق المدنة يوم الجمعة

وطار قدام كل المسلمين

طار فوق كل البلاد

وشافوه كل البنى ادمين

ناس قالوا شبح

وناس قالوا شيطان

من هنا

أمر بعزله جلالة السلطان

الحاضر يعلم الغايب

والصاحى يفوق النعسان

………………

قالت الفتاوى الاسلامية وأيدتها السياسية

أن عباس مصاب بجنان

وايدت التقارير الطبية

قالوا زنديق وقالوا حيوان

ولكل حرية سطح

وطيرانه تجاوز كل حرية

كافر بشريعة الرحمن

يا أهل قرطبة

الصاحى يفوق النعسان

………………..

سبحانه

خلق لينا ليل وخلق نهار

من أول الدنيا لمنتهاها

وسما وأرض وبحور وأشجار

وخلق فيهم الانسان

ولكل كون أسرار

وعباس بن فرناس ركب جناحين وطار

خالف كل قوانين الحنون الجبار

عباس طار بدون استغفار

عايز يوصل الليل بالنهار

استرها علينا يا ستار

يا أهل قرطبة

بيقول مافيش بينهم ستار

وان الكون والعياذ بالله مش واحد

دا أكوان

اغفر له يامنان

من هنا

أمر بعزله جلالة السلطان

الصاحى يفوق النعسان

والحاضر يعلم الغايب

…………..

فرناس

بيقول الشمس لمبة جاز

بس مكسية قزاز فى قزاز

وان الكون لوحة

واحنا لازم نخرج من البرواز

……..

يا أهل قرطبة

فرناس اتجنن خلاص

بيقول عقل الانسان عش

والأفكار حمام بتطير

الطير مخلوق من الانسان

والانسان مخلوق طير

ممكن يطير زى الحمام واليمام والعصافير

من هنا

أمر بعزلة جلالة السلطان

سنتين

الحاضر يعلم الغايب

والصاحى يفوق النعسان

يا أهل قرطبة

……………………..

 

 

 

 

 

 

Facebook Comments

احمد فتحي رزق

المشرف العام

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق
%d مدونون معجبون بهذه: