أخبار عاجلة

شيرين مرسي تكتب ـ علاقات زوجية مشوهة

لا انا مش هطّلق وهعيش عشان خاطر ولادي ميطلعوش باباهم ومامتهم مطلقين

هنعيش مع بعض منفصلين نفسيا بس نحافظ على شكلنا كأزواج قدام الناس

هو ده حال اغلب المتجوزين دلوقتي

بعد فترة من الانفصال النفسي وشعور كل واحد فيهم بالوحدة النفسية وافتقاده للشريك ، بتكون النتيجة اما الدخول في علاقات اخرى محرمه او (الزواج من اخرى للرجل طبعا) او الحياة بنفسية محطمة ومريضة..

تفتكروا زوجين عايشين مع بعض العيشة دي هيكونوا اسوياء نفسيا ؟!

تفتكروا وهما مفتقدين الحب والحنان والاحتواء والتفاهم هيقدروا ينقلوا لاولادهم اي مشاعر أسرية ايجابية مهما حاولوا يمثلوا قدامهم ؟!

– تفتكروا ربنا لما شرع الطلاق مكنش واخد باله من مشكلة وجود الاطفال دي ؟! ولا ربنا اباح الطلاق للي مخلفوش بس ؟!

– تفتكروا القاعدة هي ان :
الاشخاص الاسوياء بينحدروا من أسر سليمة لاب وام متجوزين؟؟؟
والاشخاص المضطربين نفسيا او الفشله بينحدروا من أسر مفككة واب وام مطلقين ؟؟؟

طب لو حد ضحى بسعادته واحلى ايام عمره واختار يعيش مغصوب مع حد كارهه وبيقول عشان الاولاد ، تفتكروا الاولاد لما هيكبروا هيقدروا ده ؟؟

طيب ايه نوع التقدير بتاع الاولاد لكم ؟؟ ، هيشترولكم عمر جديد مثلا ولا هيرجعوكم للماضي تعيشوا حياتكم ؟؟

ولا تكونوا فاكرين خدمة اولادكم لكم ومساندتهم ليكم في الكبر هتكون عشان انتوا ضيعتوا حياتكم عشانهم واتغصبتوا على عيشة دمرتكم نفسيا ؟؟

دا على اساس ان كل الابناء العاقين بيبقوا ابوهم وامهم مطلقين !!!

بر اولادكم لكم بيكون من حسن تربيتكم لهم واطعامهم من مال حلال واتقاء الله في افعالكم سواء كنتوا متجوزين ولا مطلقين ولا مترملين

انتوا بتضحكوا على نفسكم ..

انتوا مستمرين مع بعض لاسباب اخرى ..

– منها اسباب مادية ، ذي طمع اي طرف في فلوس الأخر

– او اسباب نفسية ، ذي الخوف من نظرة المجتمع للمطلقة او توبيخ الأهل “عيشي واستحملي وربي الاولاد ليضيعوا”

ماشاء الله الناس بتفهم احسن من اللي خلقنا !!!!

للاسف
المجتمع الاسلامي عايش مكبوت ما بين العيب والحرام واودي وشي من الناس فين ، والناس هتقول عليا ايه لو اطلقت !!

مجتمع فاسد واهي كله ظلم وفساد وانحراف اخلاقي

لا أب عارف يوجه صح ولا أم عارفه تربي وأسر مهلهله وبيوت مقفوله على ذئاب عايشه مع بعضها

حياة حيوانات بتتكاثر وبتجيب حيوانات تانية تحت مسمى “أسرة مستقرة”

Facebook Comments

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق
%d مدونون معجبون بهذه: