اسليدرمنوعات ومجتمع

الحقيقة المطلقة هنا !

سيد الهلاوى

ربنا خلق الناس كلهم كل واحد بظروفه ، ورزقه ، وعمره ، وابتلاءه ، وطاقته.
الناس رزقها مش زى بعض وحالهم مش زى بعض .

ورفع بعضكم فوق بعض درجات فَضَّلَ بَعْضَكُمْ عَلَىٰ بَعْضٍ فِي الرِّزْقِ .
ناس اتولدوا أغنياء وناس اتولدوا فقراء .
ناس جم الدنيا لقوا كل سبل الراحة موجودة.
وناس جم الدنيا لقوها صعبة وبيجاهدوا علشان يوصلوا للراحة .

ناس عندهم أمراض بيعانوا منها ، وناس أصحاء يتمتعون بصحتهم..
ناس جم لقوا نفسهم عبيد ، وناس جم لقوا نفسهم أحرار !

فكرة ال ٢٤ قيراط فكرة غير صحيحة ، لأننا بنشوف ناس عندهم كل حاجة وناس ماعندهمش أى حاجة..!
.
الحقيقه كل ماسبق هو حقيقه تدور فى رأس الكثير وإن لم يعبروا عنها ، لو كنت من الناس دول فركز فى اللى جاى ده لأنه مهم..
.
إنت هتعيش مثلاً كام سنة ؟
١٠٠ سنة ، ال ١٠٠ سنة دول فى تعداد الا نهاية تساوى لا شىء ، يعنى المفروض إن حضرتك هتخلد بعد موتك ، لما تحسب ال ١٠٠ سنه بالنسبه للخلد ، ولا حاجة ، تخيل إن يوم القيامة بس مقداره ٥٠ ألف سنة ، يعنى ده لا ١٠٠ ولا ٢٠٠ ولا ألف ، ده خمسين ألف سنة ، تساوى إيه ال ١٠٠ سنة فيهم !!

تقريبا دقائق ، فانت بتعيش فى الدنيا بالنسبة لتوقيت الكون دقائق قليلة أو أقل !

فى الدقائق دى ربنا حط لكل واحد امتحان ، بظروف مختلفة، يعنى ممكن يكون إمتحانك إنك تكون غنى ، واحد تانى إمتحانه فى إنه يكون فقير ، واحد تالت إمتحانه فى إنه ماعندوش أولاد ، واحد رابع إمتحانه فى صحته…الخ

ماتقلش إشمعنى فلان إمتحانه الغنى وأنا الفقر ، لأن مش إنت اللى بتحط الاسئلة ، مش إنت اللى بتصمم الإختبار ، اللى بيصمم الاختبار هو الحكيم سبحانه وتعالى.

الحساب فى الأخر هيكون على حسب الإختبار .
يعنى لو إختبارك الفقر ، هتكون الأسئلة صبرت وحمدت وشكرت ولا لأ..!
لو إمتحانك الغنى، عملت ايه بالفلوس وديتها فين وجبتها منين وانشغلت بيها عنى فى ايه…الخ

لو إمتحانك الصحة ، عملت ايه بصحتك ، كنت ملتزم ولا منفلت ! … إلخ هتكون الأسئلة طبقا لنوع الاختبار.

فخليك فى ورقتك وإختبارك وركز فيه ، ومتتمناش إنك كنت تكون فى إختبار غيرك ، لأنك ممكن تفرح بيه فى الدقائق اللى قلنا عليها ، وتشقى بيه آلاف السنين هناك إلى ما لا نهاية.

كلها دقائق وهينتهى الإختبار ، المهم تنجح فيه وماتعترضش على الأسئلة لان ده مش شغلك.
الناس هيتسألوا يوم القيامة كم لبثتم في الأرض عدد سنين ، قالوا لبثنا يوماً أو بعض يوم فسأل العادين ، يعنى كل الإختبار اللى تعبك ده يوم أو جزء من يوم !

دى مش دعوة إنك تفضل زى مانت ، إجتهد ، وطور نفسك واسعى للخير سواء فى مال او فى صحة أو أولاد ، بس لو حاجة منهم ماجتش حتى بعد إجتهادك… اعرف ان ده الإمتحان بتاعك ، واحرص إنك تنجح فيه فى الدقائق اللى عايشنها دى ، هتفرح إلى ما لا نهاية .

فكر فى جملة…خالدين فيها أبدا…تحب تكون فين وقتها !!

Facebook Comments

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق
%d مدونون معجبون بهذه: